لازم نفترق/د عبد المنعم الفقي
د/عبدالمنعم الفقي
........
مش بقولك.....
إن حظي غير حظوظ الناس
إن قدري غير قدر كل الخلايق
إن لون نضارتي زي الدنيا غامق
يكفي انك شوفتي وعرفتي الحقيقة
إن أنا فعلا باقاوم
بس مركب حبي تايهة
في محيط فاقد مداه
حتي أمواجه الغريقة
ماشية في كل أتجاه
لسه فاكر تنقذ الفارس
ياصاحبي آه ياقلبك
.........
مش بقولك
إن تكويني غريب
أشعاري قايدة النار لهيب
جوايا حزن الدنيا لكن
لسه في حلمي الخرافي بانتظر
فجري الهلالي المنتظر
باصبر وياما الصبر
فاق الصبر لكن منتظر
تتغير الدنيا كلها تتمحي
تتبدل الأسماء وتبقي بأختياري
وقتها آخد قراري
وقتها أختار لنفسي أسم زيك
أسم يبقي بمعني أسمك
.......
مش بقولك......
مش بقولك إني باحلم
بس حلمي غريب عجيب
مش بقولك إني ماشي
تحت أسفلت الشوارع
تلتهب رجلي أشيلها
أنزع الشوكة وأزيلها
تتصلب رجلي تميل
يتفجر دمي يسيل
تتخنق فيا المواجع
........
مش بقولك...
إني باندم علي السنين
الباقية في عمري اللي ضايع
إني باتحدي الموانع
إني فارد سيفي في وش الرياح
بس حاسس بالجراح
إني واقف في وش القدر
شايل في كفي هيكلي
والتاني فيه شنطة سفر
أسمع صفير الغربة أتنهد
وأكتم في قلبي اللي أنجرح
من كتر شيل الهم بكاني وطفح
يلمع في عيني أسمها
يشتد عرقي انتفض
أندهلها تبعد وتبعدني
معاها عنها
أحلف لها أرجع ود
وشايل مهرها
قلبي اللي داب في حبها
وأرجع والاقي المشكلة
عادت وزادت
بس أكبر مماكانت
والحل لازم نفترق
........... د/عبدالمنعم الفقي............
تعليقات
إرسال تعليق