فيك حاجة موش عادية //بقلم الشاعرة زبيدة البواب مرزوق
قصيد باللهجة العاميّة التّونسيّة.
🎻*فيك حاجة موش عاديّه...*🎻
فيك حاجة موش عاديّه
ما عرفتش آشنيّة هيّ..
فيك حاجة ما عرفتهاش
في غيرك ما لقيتهاش
ما عرفتش آشنية هي..!
يمكن الضحكة هاكيّ
كيف نسمعها..
اترجّع الرّوح فيّ..
ولاٌ صوتك موش عادي
ياخذني من هوني لغادي
ويحسّسني بالأمان
رغم الغربة بين أندادي..
فيك حاجة موش عاديّه
والله ما عرفتش آشنيّه
------------
رغم إلّي لتوّا ما ريتك
في داخل قلبي حطّيتك
لو خزرولي في عينيّ
في لمعة عيني يشوفوك
وبين حروفي يلقاووك..
-------------
فيك حاجة موش عاديّه
ما عرفت لتو شني هيّ
-------------
يمكن طريقة كلامك
ولاٌ احساسي بضعفي قدّامك
خوفك..حنّيتك عليّ
خَلِّتْني مرا موش عاديّه
فيك حاجة موش عاديّه..!!
------------
ولاّت الدِّنيا ورديّه
بعد الظّلمة في عينيّ
رجعتلي الضّحكة المزيانية
وقالولي رَجْعِتْ الفِيانه
شنيّة الحكاية هذيّه..؟!
-------------
قلتلهم في قلبي هُونِيّه
فمّا دقّة مش عاديّة
سببها حاجة مش عاديّه
ما عرفتش أشنيّة هيّ
------------
حلّيت المُرّ في حياتي
ونطّقت الحرف في سكاتي
إحساسي بيك موش عادي
قلّي شنيّة الحكاية هذيّه..؟!
فيك حاجة موش عاديّه
قلّي بربّي شنيّة هيّ..؟!
--------------🌹-----------
بقلمي
زبيدة البوّاب مرزوق
(تونس)
23.03.2019
تعليقات
إرسال تعليق