أنأ شاعر // بقلم الشاعر جمال زكي عينر
( انا شاعر ) :
انا شاعر
بقول شعري في كل مجال
على الافراح وع الأحزان وع الأحوال
على الانسان
على الأزمان
على الأحداث في كل مكان
على اللي راح وع الحاضر
على اللي لسه بيعافر
عشان لقمه
عشان هدمه
عشان الجوع يا ناس كافر
انا شاعر
بحس بغيري
عشان غيري بقى نفسي
بقى مني بقيت منه
بقى يأسه كما يأسي
بقينا كلنا نقاسي
بيشرب ويايا ف كاسي
وبس الفرق ما بيننا
بارص الشعر كالبنا
ساعة في النار
ساعة ف جنه
ساعه أعدل
ساعه اتجنى
واترجم ده في أبياتي
واشوف ذاتي
في آهاتي
في ضحكاتي
في ناس عماله بتهاتي
على الدنيا وأحوالها
تقول للدنيا اديني
فتلقاها تقول هاتي
وأضحك
وابتدي اكتب
واقول شعري ومش باكدب
ما اهي دنيا ودواره
ولفافه وحواره
تاخدنا من حاره لحاره
وفي الاخر ترجعنا
كما كنا
ولو حتى على حماره
ساعتها برضه راح اضحك
واكتب شعر بيضحك
واقول نكته
تشيل همي وهم الناس
تنسينا مرار الكاس
وتبقى الفاس ماهش في الراس
ولا في العقل في وسواس
وابقى جبت م الآخر
كإني نسيت ومش فاكر
طب اعمل ايه ؟
ما قلت اللي قدرت عليه
وحافضل برضه تاني اقول
كلام مفهوم
كلام معقول
كلام يمكن يريحنا
يفرحنا
يخرجنا من الأهوال
كلام يتغنى في الموال
وحافضل اقول واتفاخر
بإني لو ييجيني الموت
احب اموت وانا شاعر
ما انا شاعر !!!!!
بقلمي الشاعر جمال زكي عينر
تعليقات
إرسال تعليق